Taqdimot san'ati: kamroq gapiring, sekinroq ko'rsating

Montessori'da yangi faoliyat "tushuntirilmaydi" — TAQDIM ETILADI. Farqi katta.

Biz kattalar tushuntirishni yaxshi ko'ramiz: "Mana bunday qilasan, keyin bunday, ehtiyot bo'l, to'kib yuborma..." Bola esa so'zlarni emas, HARAKATNI ko'radi. So'z va harakat bir paytda kelsa, bolaning diqqati bo'linadi.

TO'G'RI TAQDIMOT QOIDALARI:

Sekin. Odatdagidan 3 barobar sekin harakat qiling. Ko'zaning tutqichini qanday ushlaganingiz, qiyalik burchagi — hammasi ko'rinsin.

Jim. Harakat paytida gapirmang. Nomlash kerak bo'lsa — harakatdan OLDIN yoki KEYIN: "Bu — quyish" (pauza) keyin quyasiz.

Chapdan o'ngga, yuqoridan pastga — yozish yo'nalishiga tayyorgarlik sifatida.

Bir marta. Qayta-qayta ko'rsatmang. Bir marta chiroyli ko'rsating va bolaga uzating: "Endi sen".

Va eng qiyini: ARALASHMANG. Bola "noto'g'ri" qilsa ham. Ko'zani boshqacha ushlasa, donni to'ksa, tartibni buzsa — kuzating, tabassum qiling va JIM turing. Material o'zi o'rgatadi (to'kilgan don ko'rinib turadi-ku!). Sizning har bir "yo'q, bunday emas" so'zingiz bolaning "men uddalayman" ishonchidan bir parcha oladi.

Qachon yordam berish mumkin? Bola SO'RAGANDA yoki umidsizlikdan ishni tashlayotganda. U holda ham: hammasini qilib bermang — faqat qiyin qadamda yordamlashing va yana chetlaning.